Na Asociación Albores Saúde Mental seguimos traballando para garantir os dereitos e a autonomía das persoas con enfermidade mental. Neste marco, desenvolvemos o programa “APOIO”, centrado en ofrecer acompañamento personalizado e apoio integral para o desenvolvemento da capacidade xurídica.
📅 Período de execución: do 1 de xaneiro ao 31 de decembro de 2025
Este programa dá resposta ás necesidades de persoas ás que os xulgados asignan medidas de apoio, ofrecendo un seguimento próximo e adaptado á súa situación. A intervención realízase dende unha perspectiva centrada na persoa, respectando a súa vontade e promovendo a súa participación activa nas decisións sobre a súa vida.
A través dun traballo coordinado entre as entidades Fundación Gavela, Morea e Albores, o programa abrangue un modelo de intervención que inclúe:
- Apoio social, económico e xurídico personalizado
- Elaboración e seguimento de Plans de Intervención Individualizados (PII)
- Acompañamento en xestións administrativas, xudiciais e cotiás
- Xestión económica responsable e prevención de situacións de vulnerabilidade
- Coordinación con servizos sociais, sanitarios e xudiciais
O programa desenvolve unha intervención continua e adaptada a cada persoa, con seguimento presencial e tamén a través de outros medios, garantindo así unha atención accesible e constante.
Durante o período de execución, as persoas participantes lograrán unha mellora significativa na súa calidade de vida, na súa autonomía e no acceso aos apoios necesarios para o seu día a día. Ademais, tamén se ofrece asesoramento a familiares e entidades implicadas, reforzando así a rede de apoio ao redor de cada caso.
Dende Albores destacamos que o apoio no exercicio da capacidade xurídica é clave para garantir a igualdade de dereitos e a inclusión social real, especialmente en contextos rurais onde o acceso aos recursos é máis limitado.
Financiamento:
Programa subvencionado ao abeiro da Orde do 11 de setembro de 2024 pola que se regulan as subvencións destinadas á realización de programas de interese xeral para fins de carácter social, con cargo á asignación tributaria do 0,7% do IRPF e do Imposto de Sociedades, promovida pola Xunta de Galicia, a través da Consellería de Política Social e Igualdade.