Na Asociación Albores Saúde Mental seguimos apostando por acompañar non só ás persoas con enfermidade mental, senón tamén ás súas familias, que desempeñan un papel fundamental no proceso de apoio e recuperación. Neste marco, desenvolvemos o programa “FACENDO FAMILIA”, centrado no apoio, orientación e formación ás familias.
📅 Período de execución: do 1 de xaneiro ao 31 de decembro de 2025
Este programa nace coa finalidade de ofrecer un espazo de apoio ás familias, mellorando a súa capacidade de resposta ante as dificultades e favorecendo unha mellor convivencia no fogar. A través dun acompañamento profesional e próximo, trabállanse aspectos clave como a comunicación, a xestión de conflitos e o coñecemento da enfermidade mental.
Entre as principais actuacións do programa destacan:
- Información e orientación sobre saúde mental e recursos dispoñibles
- Apoio especializado ás familias, fortalecendo o seu papel como rede de apoio
- Formación en habilidades de convivencia e resolución de conflitos
- Intervención mediante sesións individuais e grupais adaptadas ás necesidades de cada familia
O programa permitiu en anos anteriores, conseguir unha mellora significativa na convivencia familiar, na redución da carga das persoas coidadoras e no aumento das habilidades e dos coñecementos sobre saúde mental.
Ademais, o acompañamento contribúe a previr situacións de crise, reducir recaídas e fortalecer as redes de apoio, aspectos fundamentais para o benestar tanto das persoas con enfermidade mental como das súas familias.
Dende Albores lembramos que cando apoiamos ás familias, construimos contornas máis estables, seguras e inclusivas.
Financiamento:
Programa subvencionado ao abeiro da Orde do 11 de setembro de 2024 pola que se regulan as subvencións destinadas á realización de programas de interese xeral para fins de carácter social, con cargo á asignación tributaria do 0,7% do IRPF e do Imposto de Sociedades, promovida pola Xunta de Galicia, a través da Consellería de Política Social e Igualdade.